Worraftig allens klaar? - Kriegspropaganda von Experten und Alpha-Journalisten - ein plattdeutscher Kommentar…

 Seestadtpresse Bremerhaven - 

Allens klaar

Nu weet ik Bescheed, bölkt Herbert na den Oolen röver. Nu is allens klaar! Un he lacht so luuthalsig, as harr he een an de Marmel. All mien Lesen un Studeerren hett mi bloots dat Eeene düütlich mookt: Dat de Minschengeschicht ‘n vermuckt vertakelte Saak is. Un nu dat hier!

Herbert weiht mit dat famööse Daagblatt „Süddeutsche Zeitung“. Hier steiht allens, wat wi för’t Begriepen vun de Weltgeschicht bruukt. Du magst dat nich glöven, seggt he to den Oolen, avers hier steiht de Antwoort op de groote Fraag: Wat is „die eigentliche Ursache der neuen Unsicherheit“ in Europa un in de Welt? Hier verklaart uus de Politik-Baas vun de Süddeutsche Zeitung: „Es ist Wladimir Putins bedingungsloser Wille zum Krieg, der mit Appellen und Sicherheitsabkommen nicht aufzuhalten ist.“

Dat hest du nich dacht, dat allens so eenfach is, nich? achelt Herbert. Vörgeschichten, Interessen, poliitsche Gedankenwelten - allens Schandudel. Wenn wi begriepen wüllt, wat passeert, denn mööt wi op den Düvel mit Minschengesicht Acht hebben. Den Düvel sien Willen bestimmt allens! Wi kennt dat Muster: Jümmers staht de Düvels op de eene Siet un de Gooden op de annere Siet. 

So hebbt uus düsse Korneliusse den Krieg in de Ukraine vun Beginn an verklaart: Dat Bööse in de Gestalt vun Putin is uus över’n Hals kamen. „Wi“ hebbt jümmers bloots dat Goode wullt. Wi hebbt nich maal uuse Intressen na vörn stellt. Nee, wi wullen bloots nich tolaten, dat dat Bööse de heele Welt över’n Snabel nimmt. Desterwegen schickt wi jümmers mehr Kriegsmatriaal na de Ukraine, alleen desterwegen!

Wat hebbt Harald Welzer un Richard David Precht in ehr Book „Die vierte Gewalt“ schreben? In uuse grooten Medien findt wi jümmers mehr „den Hang zum Polarisierenden, Simplifizierenden, Moralisierenden, Autoritären und Diffamierenden“. 

Un wat findt wi veel to wenig or gaarnich? Nadenken, verglieken, poliitsche Knütten ünner de Luup nehmen, torüchkieken, utlooten, afweegen, diskereeren, analyseeren, kritiseeren - all dat, wat eegenlich de Opgaav vun de Medien is. 

Bi de Korneliusse höört sik allens so an, as weer de Welt platt. Putin siene „aggressiven Absichten“ sünd dat alleen, de uuse Welt toschannen mookt. Nix anners speelt door noch ‘n Rull!

Herbert kiekt nu meist vertwiefelt ut de Wäsch. Dat dröff doch allens nich wahr sien, fluustert he. 

De Oole kiekt Herbert an. Is dat avers, seggt he bloots.

Detlef Kolze