Reputatschoon

He is 'n klooken Keerl, de ornlich wat lehrt hett. He will wat beschicken in't Leben, will veel Geld verdeenen un will bi anner Minschen 'n Reputatschoon hebben. He is stolt op sien Rull in de Gesellschaft un kennt all de Lüüd vun Bedüden. Se smeert em Honnig üm 'n Baart, denn he weet Bescheed un kann wat op sien Rebeet. Sien Rebeet, dat is Recht un Gesetz - he is Afkaat.

So kennt he ook dat Utlooten vun Fragen un Mucken un Knütten un dat Sand-in-de-Oogen-streuen, man he hett jüst so den Blick för dat Tosamenhangen op dat groote Feld vun't minschliche Doon un Handeln. He findt nich bloots de Taktik, man ook de Strategie - jümmers mit allens wat he weet un wat he an Kontakten hett. Un all dat sett he in för Lüüd, de em goot betahlen köönt.

Dat gifft nix, wat he nich deit, wenn dat Geld stimmt or wenn he döör de Saak noch wat beter in't Licht rückt ward. He verköfft sien Gaben un Talenten, wenn annere man bloots estimeeren köönt, wat he allens weet un kann.

He splintert Stücken vun sien Seel gegen Geld af, wenn he den Baas speelen kann. Wenn he as Winner doorsteiht un de annern to em hooch kieken mööt. Dat kiddelt em de Seel, un he meent, dat güng ohn Schaad för sien Seel af. För Reputatschoon un Geld deit he allens, wenn't nich jüst 'n Verbreken or 'n afsluuts schabbige Saak weer.

He is'n feinen Keerl, hett Grips un Witz, is charmant, weet Geschichten to vertellen. Kann eernsthaftig sien un sik in de Sielen hangen, wenn dat 'n wichtige Saak is för siene Stadt un ehr Minschen. Man för dat Rampenlicht un dat Geldverdeenen smitt he dat lichthannig in Schiet un Dreck. Schaad eegenlich, denn so mookt he toschannen, wat an em heel un deel besünners is.

He kennt den Satz vun Benjamin Franklin, de maal schreben hett: "Wer meint, dass man für Geld alles haben kann, gerät sehr leicht in den Verdacht, dass er bereit wäre, für Geld alles zu tun." He kann sik door siene Gedanken över moken un Bispillen doorför finnen un mennigmaal sogaar den Kopp door över schüddeln, wat Minschen allens tostannen kriegt op de Jachteree na Geld. Un liekers kummt ook bi em sülbens oftins datsülbige bi ruut.

Un so steiht he opletz mit all sien Gaben bloots noch normaal un begäng in düsse Welt - een gemeenen lütten Minschen, de för Geld un Ansehen quantswies sien Seel verköfft. Schaad eegenlich.

Detlef Kolze