Saturday, September 21, 2013

Bundestagswahl: "Wi hebbt de Wahl: Sand, nich Öl!"

Hest dat mitkreegen? fraag de Fru vun den Oolen: In de Türkei hett sik annerletz 'n Mannsminsch eenfach mucksmusenstill op de Straat stellt un anfungen, in'n Book to lesen. Dat sehg toeerst 'n beten wat verdreiht ut, man denn geef dat jümmers mehr Lüüd, de dat jüst so moken, un an't Enn weer dat sowat as 'n Demonstration wedder de poliitschen Tostännen in't Land.

So is dat richtig, roop de Oole luuthals. Dat mutt veel mehr passeeren. De Lüüd mööt wiesen, dat 'n Hollstopp nödig is un dat se de Richt vun uuse Politik ännern wüllt. Förwiss, dat gifft 'n Sackvull Minschen, de freut sik över dat Wieter-so, to'n Bispill wenn't jem goot güng in de lesten Jahren so as uuse Geldlüüd, de jümmers mehr insacken kunnen. Man dat Beter-in-de-Wull-Sitten vun'n Minnerheet is doch bloots de eene Siet, gnurr de Oole.

Denn door gifft dat 'n groote Tahl vun Minschen, de siet lange Jahren mit ehr Inkamen op de Stee trampelt, un door sünd veel to veele, de mööt mit vermuckt veel weniger as vörher trecht kamen. So is dat, grummel de Oole na sien Fru röver: Baben ward toleggt un ünnen ward dat Bekniepen un Knappsen duller un duller.

Wi hebbt uus Tosamenleben so organiseert, dat Millionen vun Minschen eenfach nich mehr bruukt ward, schimp he. Dat kann 'n doch sehen an all de powerigen Minschen op uuse Straten. Un dat ward jümmers mehr! Ja, ik weet dat ook, sä he: Jeedeen is nich to helpen, man mi dücht, dat wi de armen Lüüd veel to fröh an de Kant schuuvt un jem mit de Knütten in ehr Leben alleen laat. Man alleen köönt se düsse Knütten eben nich open kriegen.

De Oole reck de Hannen in de Luft. De Sozialstaat is bi uus op de Flucht, roop he. Sowat as dat För'n-anner-Instahn kummt in de groote Politik ut de Mood, un wenn denn bloots noch de privaten Naverschaften un Vereenen inspringen schüllt, denn langt dat op de Duur nich hen, ook wenn dat privaate Helpen förwiss richtig is.

 De Oole lüüster na sien Fru röver. Se harr nix seggt un smüüster liesen. De Oole weer woller in Füür kamen. Man se kenn siene Gedanken un stimm doorbi mit em övereen. Sowat as ehr Grundsatz weer to'n Bispill bi den Dichtersmann Günter Eich to lesen, un se kunn dat ut'n Kopp herseggen: "Wacht darüber, dass eure Herzen nicht leer sind, wenn mit der Leere eurer Herzen gerechnet wird! Tut das Unnütze, singt die Lieder, die man aus eurem Mund nicht erwartet! Seid unbequem, seid Sand, nicht das Öl im Getriebe der Welt!"

Tja, achel de Oole: "Sand, nicht das Öl im Getriebe der Welt". Door mook wat vun - Dag för Dag, un ook düssen Sünndag bi de Wahl. Detlef Kolze

0 Comments:

Post a Comment

<< Home