Düsse schööne oole "WOHLVERFUGTE ZEIT" is ut’n Liem - nich dat eerste Maal...

Seestadtpresse Bremerhaven - In de Tieden vun William Shakespeare geef dat ook sowat as ‘n „Zeitenwende“. Dat verklaart de Översetter Frank Günther in sien Book „Unser Shakespeare“. Dunntomalen weern de Minschen an’t Lamenteeren, denn dat güng daalwarts mit dat oole Herkamen, de Moral un de Sitten. Dat oole Weltbild pulter döörnanner. „Die Welt ist aus den Fugen“, so de Överschrift vun een Kapittel. 

De Oole lees dat neeschierig, denn he harr oftins mit sien Fründ Volker över düssen Gedanken diskereert. „Ich versteh die Welt nicht mehr“ - an düssen Satz warrn se oftins behangen bleben. In Günther sien Shakespeare-Book stünn dat so: „DIE WOHLVERFUGTE ALTE ZEIT bot ein Weltorientierungsgerüst“, avers dat funkscheneer nich mehr. 

Dat Ut’n-Liem-Krachen vun de oolen Tostänn in’t Tosamenleben passeert jümmers woller in de Minschengeschicht. Ook vundaage föhlt wi dat Döörnanner un dat Enn vun de „WOHLVERFUGTE ALTE ZEIT“, ofschoonst wi nich seker sien köönt, dat worraftig wat Neejes in de Gangen kummt. 

Wat in uus Vundaage allens överkopp geiht, leest un höört un seht wi Dag för Dag in uuse Medien. Wat vör dree or veer Jahren noch ohn Twiefel as wiss un worraftig faststünn, dat gellt nu nich mehr. Wi mööt uus Ümgahn mit Ümwelt un Klima jüst so ümstellen as uus Ümgahn mit de Technik. Wi beleevt ‘n gewaltig Ümtakeln vun uuse binnenlandsche un uuse butenlandsche Politik.

Un de Oole hett oftins door över nadacht, of em woll ook noch maal so richtig slimme Tieden över’n Hals kamen kunnen. Noch köönt wi uus dat annerwegens bekieken, un wi hööpt, dat sik door nix an ännert. Avers afsluuts seker sien kann woll keeneen in Europa. Dat weer vör’n paar Jahren noch ganz anners.

Noch eene Saak mookt den Oolen unrusig: Bi jeedeen Koppheistergahn vun de oolen Regeln un vun dat normaale Een-in’t-anner hööpt de Minschen, dat de Welt achterna ’n beten beter inricht ward. Man as dat utsüht, funkscheneert dat ook dütmaal nich so recht mit dat Lehren ut verleden Tieden. Geiht dat poliitsche In-de-Schiet-Griepen villichtkregel wieter?

Frank Günther sien Book dreiht sik üm „Einblicke in Shakespeares fremd-verwandte Zeit“. So leest wi denn to’n Bispill in „König Lear“: „Das Schlimmste ist noch nicht erreicht, solang wir sagen können: ‘Dies ist das Schlimmste““. Un door steiht ook: „Das ist eine böse Zeit, wenn Wahnwitzige die Blinden führen.“

De Oole grient jümmers, wenn he dat leest. Shakespeare kann uus Sinneeren över uuse Tiet wunnerbaar anstökern, meent he - ook wenn siene Theaterstücken mehr as 400 Jahren oold sünd.

Detlef Kolze